ITR Form, Anaa na sa Internet

Sugod niadtong Marso 16, mahimo nang mag-fillout og income tax return (ITR) form sa website sa Bureau of Internal Revenue (BIR).

Matud pa ni BIR Commissioner Kim Henares nga mas dali na sa usa ka taxpayer ang pagtubag sa mga gikinahanglang impormasyon tungod kay mahimo na kini sa computer.

Giingong dili na kinahanglan pang mo-adto pa sa BIR office aron mokuha og ITR form.

Imbes sa mano-manong pagtubag, mahimo nang direktang e-encode ang data sa eBIR form, e-edit ug e-save sa taxpayer unya e-print aron ihatud sa buhatan sa BIR o sa mga accredited nga bangko.

Giingong aduna kini automatic computation ug adunay katakos mo-validate sa impormasyong na-encode sa taxpayer.

Gawas niini, mahimo na usab ma-download ang ITR form nga naka-PDF file sa website usab sa BIR ug mano-mano kining tubagon.

Gipasabot sa kalihim nga bisan midaghan na ang mga pahina sa form nga makita sa ilang website, walay kabag-ohan sa content niini.

Samtang mihangyo si Henares nga itunol na ang ITR sa dili pa ang deadline sa Abril 15 aron dili magdungan-dungan.

Image Credit: www.philstar.com