Isyu sa ‘Over Kill’ Imbistigahon sa CHR

•CHR-7 mosuta kun wala ba malapas sa kapolisan ang rules of engagement sa ilang gipahigayon nga operasyon, atol sa enkuwentro Bohol.

Gitakdang imbestigahon sa Commission on Human Rights (CHR)-7 ang giingong over kill kun sobra ka bangis nga matang sa pagpatay nga gihimo sa kapolisan ngadto sa mga suspek nga mibanhig patay sa hepe sa kapolisan sa lungsod sa lalawigan sa Bohol.

Ang hepe sa mga imbestigador sa CHR-7 nga si Primo Cadampug nagkanayon nga ang ilang buhatan moadto sa balay ni Arnie Camero, usa sa mga suspetsadong namatay sa operasyon sa kapolisan sa Bohol.

Si Camero giingong lumad nga taga syudad sa Talisay, Cebu kinsa usa sa giingong suspetsado sa pagpapusil patay kang Chief Inspector George Cana, hepe sa Ubay Police Station.

Si Chief Ins. Cana didto banhigi sa mga suspek sa barangay Balintawak, lungsod sa Talibon niadtong Sabado sa gabii.

Matud pa ni Cadampug nga ilang pagkigsultihan ang pamilya sa maong namatay ug susihon ang mga samad pinusilan nga naangkon niini. Kini aron masuta kun tinuod ba ang gikatahong gipasubrahan sa pagpatay ang maong suspek.

Gawas kang Camero, si Cadampug miingon nga ila usab nga susihon ang beach resort sa barangay Puerto San Pedro diin nahitabo ang panag-engkuwentro sa kapolisan ug sa mga suspetsado mga alas 8:00 sa buntag niadtong Domingo aron pagsuta kun wala ba malapas sa kapolisan ang rules of engagement sa ilang gipahigayon nga operasyon.