International Women’s Day 2016, March 8 Tuesday

Malipayun ug aktibong misalmot ang libuan ka mga kababayen-an gumikan sa 75 ka barangay sa amihanan ug habagatang bahin sa dakbayan sa gipahigayung 2016 National Women’s Month nga aduna’y tema nga “Kaayuhan ni Juana, I-apil sa Adyenda.”

Ang maong programa gidumalahan sa Cebu City Women and Family Affairs Commission nga gipanguluhan ni Kapitan Althea Lim.

Suot sa ilang lain-laing mga kolor sa t-shirt, gilusad ang usa ka parada sayo sa buntag human kini gisundan sa usa ka santos nga misa sa Plaza Sugbo.

Ang maong selebrasyon gitambungan ni Cebu City Mayor Michael Rama, Vice-Mayor Edgar Labella, Councilor Dave Tumulak, Kapitan Lotlot Ignacio-Soon sa Barangay Inayawan , Kapitan Joel Garganera sa Barangay Tinago, Former Congressman Jun Alcover, Former City Councilor Edwin Jagmoc, Chairman sa Cebu City Women and Family Affairs Commission, Kapitan Althea Lim sa Barangay Pardo ug uban pa.

Gipasidunggan ni Mayor Rama ang tanang kababayen-an ug ang Women’s Comission ubos sa pagdumala ni Althea Lim kaabag ang uban pang mga komisyuner, ahensya, institusyon, NGO ug kapulungan alang sa ilang padayun nga pag-alagad ug pagsuporta sa mga programa alang sa kababayen-an.

Gi handom pud sa mayor ang iyang inahan nga si Natividad Lopez-Rama sa pagkamapinanggaon ug sa paghatag ug maayong pagtulun-an niini sa iyang mga anak.

Busa, gihagit ni Mayor Rama ang tanan ug ang Women’s Commission sa pagpahigayun ug mga programa alang sa budgeting ug value formation ug alang pud sa mga ginikanan sa pagtutok ug pag giya sa pagpadako sa ilang mga anak.

Gani, mipasalig siya sa iyang tim-os nga suporta uban ang kagamhanan sa dakbayan sa sugbo sa mga programa alang sa women empowerment. (Cebu City Public Information Office PIO)