ILO Nagkinahanglan og mga Trabahante

Ang International Labour Organization (ILO), ang the nagsilbing kamot o kaabag sa pamuo sa United Nations, nagkinahanglan og mga trabahante sa nagkalainlaing posisyon alang sa ilang mga trabahoon dinhi sa Visayas.

Matud pa ni Simeon Remata III, Monitoring and Evaluation Consultant sa ILO, UN nga ang mga kalipikadong aplikante idestino didto sa Negros Occidental, Tacloban City ug Cebu City.

Midugang si Remata, nga ang idestino sa nagkalainlaing lugar sa Negros Occidental mao ang kalipikado isip Program Assistant nga may kontrato sulod sa tulo ka buwan isip external collaborator ug kinahanglang graduado sa Social Science.

Gawas niini, may duha ka tuig usab nga kasinatian sa paghugpong sa katawhan sa komunidad, kasinatian sa pagdumala og proyekto, nga may mga kauban usab o partnership.

Miingon si Remata nga hatagan og unang pagtagad ang kaantigo manulti og Hiligaynon, ug ang kalipikado diha-diha makasugod dayon sa iyang trabaho sa sunod semana.

Ang laing posisyon nga gitanyag sa ILO mao ang Livelihood Program Assistant alang sa Tacloban City ug Cebu City nga may tulo usab ka buwan nga kontrato isip external collaborator.

Graduado sa mga kurso nga social science, business ug accounting, ug bisan bag-o pang migraduwar mahimo na nga mo-apply.

Matud pa ni Remata nga sa maong posisyon, mas labing maayo nga kaantigo mosulti og Waray ug Cebuano ang mga aplikante.

Ang kalipikado makasugod dayon pagtrabaho sa sunod semana.

Midugang si Remata nga matag aplikante kinahanglang may tulo ka mga references o mga kaila nga ipataban sa aplikasyon uban sa mga papeles ug dokumento nga gikinahanglan sama sa Transcript of Records o Diploma(Xerox) ug ipadala ngadto sa thirdremata@gmail.com atol o sa dili pa ang Pebrero 18, 2015.

Ang buhatan sa ILO, UN anaa mahimutang sa Sim Building, National Highway, Bogo City, Cebu ug makontak sa Remata sa cellular phone number: 0916 675 5057.