Ihawan Gipasirad-an

Duha ka ihawan sa kahayopan dinhi sa dakbayan sa Sugbo gipatak-opan sa mga opisyal sa City Hall kay namatud-an nga hugaw ug nakalapas sa mga lagda sa Sanitary Code.

Si Dr. Pilar Romero, hepe sa Department of Veterinary Medicine and Fisheries (DVMF), miingon nga ang gipasirad-an nila nga ihawan mao ang gipanag-iya sa mga Baldueza ug ang laing ihawan nga iya sa mga Mantalaba.

Matud ni Dr. Romero nga ang ihawan nga iya sa mga Baldueza namatud-an nga nakamugna og kahugaw kay ang ilang mga hugaw gikan sa giihaw nga kahayopan direkta ra nila nga gilabay sa sapa.

Ang maong sapa nga gilabayan nila og hugaw mao ang sapa nga moagi sa kilid sa simbahan sa Blessed Sacrament ug ngadto sa Tejero. Ang laing ihawan nga iya sa mga Mantalaba gipasirad-an kay nahimutang sa labayanan og mga basura sa Inayawan.

Dihang gipatak-opan kini sa miaging tuig ang mga tagdumala niining maong mga ihawan mihangyo nga hatagan sila’g usa ka tuig nga matuman nila ang lagda apan napupos na lang ang usa ka tuig nga termino walay nahitabo.

Pagka karon aduna na la’y 28 ka ihawan nga legal nga nag-operate dinhi sa dakbayan apan duna sa’y duha niini nga gibantayan kay wala usab makatuman sa lagda sa sanitary code ug gihatagan pa lang og higayon nga tumanon ang balaud.

Matud ni Romero nga ilang katungdanan ang pagsiguro nga limpyo ang mga karne nga maihaw gikan sa mga ihawan.