“Honesty Store” Sulod sa CPPO

Masuwayan na g’yud kun ang mga polis dinhi sa Sugbo dili ba mga tikasan ug kasaligan ba sa ilang pagka polis.

Duna karo’y coffee shop sulod sa Cebu Provincial Police Office (CPPO) nga walay tindera nga nagbantay ug ang mga customers gilauman nga dili manikas ug mobayad g’yud sa ilang imnon nga kape ug ubang makaon.

Gisundog ni CPPO director Noel Gillamac ang gimugna nga “honesty store” didto sa usa ka isla sa Batanes nga wala ‘say tindera ug ang mopalit mobutang ra sa ilang kuwarta nga bayad diha sa lamesa.

Sa CPPO ang tindahan gihinganlan nila og “Noy Honesto Coffee Shop” nga nahimutang inigsulod g’yud sa CPPO.

Kun mopalit ka sa mga baligya ug nagkinahanglan ka ug sukli sa imong kuwarta ikaw ra ‘sab ang mokuha gikan sa kuwarta nga anaa ra sa lamesa.

Matud ni Gillamac nga ang ilang gihimo usa ka eksperemento ug ang kalampusan niini makuha gikan sa mga kustomer sa maong tindahan nga kasagaran mga polis ra ‘sab nga mopakita sa ilang pagkamatarong ug dili mopahimulos sa higayon.

Ang maong tindahan duna’y baligya nga candies, noodles, pan nga gihimo sa mga piniriso sa Cebu Provincial Detention and Rehabilitation Center, coffee ug uban pa nga mga baligya.

Si Gillamac mipasabot nga ang tumong nila sa maong programa mao ang pagsilsil sa alimpatakan sa mga polis nga sila mahimong matinud-anon ug dili mopahimulos sa panahon.

Karon pa lang duna na’y plano si Gillamac nga mabutangan ug mga ceiling fans ang maong lugar ug plano ‘sab nila nga mabutangan ug libreng Wifi sa lugar uban ang pakig-alayon sa Department of Science and Technology (DOST).

Nagplano na usab si Gillamac nga ang maong ideya sa negosyo iyang isugyot niya sa kadagkoan sa Campo Crame aron ipatuman ‘sab kini sa ubang buhatan sa kapulisan sa tibuok nasud.