Hepe sa Probe Nangayog Pasaylo

Kadtong mga kawani sa Cebu City Hall nga nadistino sa PROBE Team ug migamit sa ilang service vehicle pagguba sa sementado’ng kural nga nakababag sa aseras sa dalan Tres de Abril nangangkon nga sayop ang ilang gihimo.

Matud ni Raquel Arce, pangulo sa Prevention Restoration Order and Beautification Enhancement (PROBE), nga gikasab-an niya si Antonio Diate nga maoy lider sa team, ang drayber nga si Rolando Pacaña ug lima ka sakop tungod sa ilang gihimo.

Giangkon ni Arce nga nakahatag og dako’ng kauwawan kaniya ug sa tibuok PROBE Team ang gihimo sa grupo ni Diate. Matud ni Arce ang tukma unta nga himuon mao ang paghigot og pisi sa koral ug bitaron kini sa sakyanan aron matumba.

Ang mga sakop sa PROBE, apil na si Arce, nagkauyon nga magtampo-tampo sila aron nga mapaayo nila ang naguba nga bahin sa trak de karga nga mibundol sa semento’ng koral.

Samtang iduso usab ni Arce ngadto sa Human Resource Development Office (HRDO) ug sa opisina ni Mayor Michael Rama ang report kabahin niini.

Gitataw ni Arce nga ang pagpaayo sa sakyanan wala ni magpugong sa pagpahamtang og silot ngadto sa mga hingtungdan.

Hinoun, nangayo’g pasaylo si Arce sa publiko kabahin sa nahimo’ng sayop sa iyang mga sakop nga nakuhaan og video ug na-upload sa Facebook.