Hepe sa PROBE, Gibaharan og Kiha

Usa ka negosyante og mga cellphones nga gibaligya diha sa aseras sa eskena Sanciangko ug Leon Kilat mibahad nga ikiha niya si Raquel Arce, ang pangulo sa City Hall clearing team.

Matud ni Rolando Alfeche, usa ka senior citizen, nga gitigom niya karon ang mga ebidensya nga magamit sa pagpasaka og kaso nga grave abuse of authority adto sa Ombudsman-Visayas ug laing kaso nga Child Abuse adto sa piskaliya.

Ang mga sakop ni Alfeche naglakip sa mga bata nga anak sa taga Tacloban nga ania karon sa Sugbo human mabiktima sa bagyo’ng Yolanda.

Si Alfeche, nga retirado’ng magtutudlo, miingon nga mga sakop sa Prevention Restoration Order Beautification Enhancement (PROBE) nangulata og menor-de-edad atul sa operation nila kaniadtong Sabado.

Matud pa, dunay tulo ka lalaki nga gipangdakop sa mga sakop sa PROBE atol sa ilang operation kaniadtong Sabado kay matud pa misukol kanila.

Matud ni Alfeche nga ang mga naninda og cellphones wala makabalda sa aseras kay ang tindahan sa mao nga dapit nanirado na usa sila mosugod pagladlad sa ilang baligya.

Si Alfeche miingon nga mikalit lang og abot ang mga sakop ni Arce og wala sila magpaila nga kawani sila sa City Hall. Ang mga sakop sa PROBE miingon nga andam sila nga moatubang sa kaso kun si Alfeche modayon pagkiha kanila.

Matud ni Arce nga dugay na nila nga gipasidan-an ang mao nga mga sidewalk vendors nga dili alihan ang aseras aron dili mabalda ang mga lumalabay.