Hepe sa LTO-7 Girelyibohan

Gibutyag ni Regional Director Arnel Tancingco sa Land Transportation Office (LTO-7) nga ang pangulo sa Operations Division sa LTO-7 girelyibohan sa iyang katungdanan.

Apan gipasabot ni Tancingco nga ang pagtangtang kang LTO-7 Operations Division Chief Macario Getaruelas kabahin sa reporma sa LTO, sigon usab sa kamanduan gikan sa Department of Transportation and Communication (DOTC) ilabina sa operations division office.

Miingon si Tancingco nga si Getaruelas gihulipan ni Joel Maloloy-on, ang hepe sa LTO Carcar district office.

Samtang si Getaruelas mao usab ang gihulip ni Maloloy-on sa LTO district office sa syudad sa Carcar.

Si Tancingco niingon nga ang gibasehan sa pagbalhin ni Getaruelas sa laing buhatan mao ang evaluation sa ilang labaw.

Samtang iyang gipahibawo nga si Maloloy-on gihatagan usab og pagtugot nga makakuha og mga kawani nga kasaligan niini alang sa epektibong operasyon sa LTO, ilabina sa pagpitol niadtong mga motorista nga makalapas sa mga lagda sa trapiko.

Kini ang hinungdan nga may dili mominus sa 4 ka casual ang wala na usab ma-renew kay wala makapasar sa evaluation.

Dugang pa ni Tancingco nga posibling may revamp usab nga mahitabo sa ubang district office sa LTO sa Central Visayas base unya sa ipahigayon’g evaluation nga himuon sa ilang labaw.