Health Center Problema sa Brgy. Budlaan

Tungod kay nagkadaghan na pag-ayo ang mga mipuyo karon sa Barangay Budla-an nga usa sa relocation site sa mga pamilya nga gidemolis ang kabalayan dinhi sa dakbayan, adunay panginahanglan nga palapdan ang ilang health centers.

Si Budla-an Barangay Captain Nerissa Antolihao nagpatabang karon ni Konsehal Alvin Dizon aron kagahinan og duha ka milyon ka pesos ang para sa pagtukod og extention barangay health centers.

Matud sa kapitan nga aron maalaragan g’yud nila ang tanang modangop sa ilang health centers, adunay panginahanglan nga padak-an ang barangay health center ug mas nindot kun dugangan usab ang mga health personnel nga idistino.

Plano ni Kapitan Antolihao nga ang extention barangay health center adto kini tukora sa Sitio Kapasar nga duol ra sa nahimutangan sa mga gibalhin pagpapuyo sa mao nga dapit gikan sa Barangay Carreta, Mabolo ug uban pa.

Bisan tuod og wala ibutyag ni Kapitan Antolihao kun pila ka molupyo ang iyang barangay, apan matud niya nga nagkadaghan g’yud ang mga lumolupyo kay sagad mao kini ang dapit nga pabalhinan sa mga apektado sa demolition.

Gipasalig sa mga konsehal sa dakbayan nga ilang pangitaan og paagi nga kahatagan og katumanan ang tinguha ni Kapitan Antolihao apan hinuon ang opisina sa mayor maoy giawhag nga mopagahin og kantidad para sa mao nga proyekto.