Hapit na Mahuman ang Rehabilitasyon sa Bohol

Gipasigarbo niadtong Biyernes sa milabayng semana ni Presidente Benigno ‘Noynoy’ Aquino III nga hapit na mahuman ang rehabilitasyon sa Bohol gikan sa mga kadaot niini dala sa linog niadtong Oktubre 15 sa miaging tuig.

Sa iyang pamahayag niadtong Biyernes sa gipahigayong media interaction, tanang mga dalan ug temporaryong taytayan maagian na samtang gitiwas pa ang mga permanenteng taytayan hangtud Oktubre 2014.

Gibutyag usab sa Presidente nga ang National Housing Authority (NHA) mihatag og tag P10,000 housing assistance ngadto sa 38,800 ka pamilya. Ang Department of Social Welfare and Development (DSWD) usab, nakahatag na og tag P10,000 isip shelter assistance sa 34,000 ka pamilya.

Sa kinatibuk-ang 8,000 ka balay nga hingpit nga nagusbat giingong may nahuman na og panday, samtang nagpadayon pa ang construction sa 4,517 ka units.

Dugang pa sa Presidente, adunay 11,398 na ang nakabenepisyo sa 13-day cash-for-work program ug 42,000 pa ang gikatakdang makadawat og partial employment.

Miduaw si PNoy sa ika-limang higayon sa lalawigan human sa kusog nga linog sa miaging tuig aron pagtambong sa paglusad sa Bohol Fabrication Laboratory (FabLab) Shared Service Facility didto sa Bohol Island State University (BISU).