Hangyo sa DPWH Gibasura sa DENR

Gibasura sa Department of Environment and Natural Resources (DENR) 7 ang hangyo sa Department of Public Works and Highways (DPWH) 7 nga libkason ang Cease and Desist Order (CDO) nga giluwat niini tungod sa pagkahanaw sa 79 ka mga kahoy nga gitanum sa center island sa dalang Sergio Osmeña Boulevard ning syudad sa Sugbo.

Kini bisan pa man og balido ang gihatag nga mga hinungdan sa pag-ibot sa mga kahoy.

Si DPWH-7 Regional Director Ador Canlas mitug-an nga dalion nila paghuman ang pag-semento sa maong dalan alang sa umaabot nga mga international event nga “Iron Man Triathlon” karong Agosto 3, 2014.

Anha motadlas sa maong karsada ang mga bicycle racers sa maong kalihukan busa ilang gihawanan ang maong lugar ug gipanglarot ang mga kahoy nga makalabalda sa ilang proyekto.

Laing girason ni Canlas mao ang pagbisita sa Santo Papa dinhi sa Sugbo karong Enero 15, 2015 ug ang ipahigayon nga Asia-Pacific Economic Cooperation (APEC) Summit sa sunod tuig gihapon dinhi sa syudad sa Sugbo.

Si Canlas mipasalig sa DENR-7 nga tumanon niini ang tukmang paagi sa pag-earth-ball sa mga nagpabiling tanum uban ang pagpakig-alayon sa Office of City Park and Play Ground Commission sa syudad sa Sugbo ug ang Community Environment and Natural Resources Office (CENRO).

Apan giklaro ni DENR-7 Regional Director Isabelo Montejo nga dili mahimong ihikling lamang ang mga balaod ug lagda sa DENR tungod lamang sa maong mga international events.

Matud pa ni Montejo nga malibkas lamang ang iyang giluwat nga CDO sa higayon nga tumanon na sa DWPH-7 ug sa kontraktor niini nga mao ang WT Construction sa paghatag og 7,900 ka mga punoan sa igtatanom nga kahoy isip hulip sa gipanglarot nga 79 ka punoan gikan sa center island sa Sergio Osmeña Blvd.

Alang sa DENR, kun nananghid lang og tinarong ang kontraktor sa ilang pagpuril sa maong mga tanom, dili na unta mosangko pa sa hukmanan ang maong hitabo.