Grupo Mo-imbestigar sa Pagplaster sa Baba sa Bata

Hingpit na nga naumol ang Inter Agency Investigation Group (IAIG) nga mo-imbestigar sa gikatahong nurse nga miplaster sa baba sa bag-ong natawo didto sa Cebu Puericulture and Maternity House.

Ang mga ahensiya sa kagamhanan nga magtambayayong sa pag-usisa sa maong kaso mao ang Department of Health(DOH)-7, Department of Social Welfare and Development (DSWD)-7, Commission on Human Rights (CHR)-7, Philippine National Police (PNP), National Bureau of Investigation (NBI)-7 ug ingon man ang Professional Regulation Commission (PRC).

Si Zuseth Jabonete , tigpamaba sa DOH-7 nagkanayon nga ang nagkadaiyang ahensiya sa kagamhanan may tagsa-tagsa ka mga tahas sama sa pagbawi sa lisensiya sa hospital nga iya sa DOH-7, pagtan-aw sa kalapasan sa tawhanong katungod, sa CHR-7, pag-atiman sa kahimtang sa bata ug sa mga ginikanan niini nga iya sa DSWD-7, paghipos og ebidensiya ug pagpasaka sa maong kaso nga iya sa PNP ug NBI, ug sa pagkuha sa lisensiya sa nurse nga iya usab sa PRC.

Miingon sa Jabonete nga ilang pahibaw-on ang naasoy nga hospital sa nakab-ot nga disisyon sa IAIG sa Lunes karong adlawa dungan ang pormal na sa pagsugod sa ilang imbestigasyon.

Nasayran nga ang Cebu Puericulture and Maternity House napakyas gihapon sa pagsumiter sa incident report sa naasoy nga pagplaster sa nurse sa baba sa batang bag-o natawo. Nasayran nga ang hinungdan sa pagtabon sa baba sa bata tungod sa pagpunay og tiyabaw niini.