Grupo Miawhag Wad-on ang NAT

Ang Alliance of Concerned Teachers (ACT) – Region 7 misuporta sa awhag nga wad-on na ang National Achievement Test (NAT) kay daghang report sa matud pa pagpanikas sa maong pasulit.

Ang presidente sa mao nga kahugpongan nga si Antonia Lim, usa ka maestra sa mathematics sa Abellana National High School, miingon nga ang NAT walay kapuslanan.

Matud ni Lim nga nahimong walay kapuslanan ang NAT tungod kay ang mga maestra mismo maoy mohatag og ideya sa mga tinun-an kun unsay ipagawas sa NAT.

Dunay mga maestra nga miangkon nga tudloan g’yud nila ang ilang mga tinun-an sa mga posible nga ipagawas sa NAT aron dili mogawas nga walay nakat-onan ang ilang mga tinun-an.

Nasayran nga ang resulta diay sa NAT maoy himoong basihanan sa paghatag og bonus ingon man sa kantidad nga ihatag isip Maintenance and Other Operating Expenses (MOOE).

Matud ni Lim nga tungod sa performance-based bonus nga gipatuman ni Presidente Aquino III base sa resulta sa NAT, ang mga magtutudlo maninguha g’yud nga daku ang ratings sa ilang mga tinun-an sa NAT.

Ang NAT gihimo mata’g tuig sa Department of Education (DepEd) diin ang National Educational Testing and Research Center mogamit sa resulta sa NAT sa paghimo og mga research ug ubang angayang himoon sa edukasyon sa nasud.