Gobyerno, Nangandam sa Panimawos sa NPA

Andam ang gobyerno sa posibleng panimawos nga ilusad sa New People’s Army (NPA) human masikop sa militar sila si Benito Tiamzon, Wilma Austria ug lima pa ka rebelde sa lungsod sa Carcar Cebu niadtong Sabado.

Matud pa ni Presidential spokesman Edwin Lacierda, wala nila igsapayan ang himuong lakang sa NPA, kay ang mahinungdanon mao ang pagkasikop sa mga lider niini.

“We are fully aware of the possibility and again we are ready to protect the citizenry, our population, and the armed forces are always ready to defend them,” matud pa ni Lacierda.

Si Tiamzon ang gikatahong kasamtangang pangulo sa Communist Party of the Philippines (CPP) ug sa armadong grupo niini nga mao ang NPA. Samtang si Austria usab ang gikatahong top-ranked CPP central committee member ug finance officer.

Matud pa, wala supaka sa militar ang Joint Agreement on Safety and Immunity Guarantees (JASIG) nga gipirmahan tali sa kagamhanan sa Pilipinas ug CPP-NPA-NDF niadtong 1995, ning ilang pagsikop ni Tiamzon ug mga kauban.

Midugang si Lacierda nga walay kamatuoran ang gipahayag ni exiled CPP founder Jose Ma. Sison nga iligal ang pagsikop sa maong lider ug mga kauban niini.

Sa samang higayon, mireklamo usab si Luis Jalandoni, ang tigpamaba sa National Democratic Front (NDF), kay kuno gisupak sa militar ang JASIG.

Apan naanad na ang militar sa kabagibian og baba ni Jalandoni, busa wala na sila mabag-ohi niini tungod kay kanunay nga ingon siya niini kasaba matag adunay masikop ang militar nga mga lider sa komunistang grupo.

Image Credit: newsinfo.inquirer.net