Gobyerno, Nakadaginot og P231-M sa Gipalit nga Bakuna – Ona

(PIA) — Gitataw ni Department of Health (DOH) Kalihim Enrique Ona nga nakadaginot ang gobyerno og P231 milyon sa pagpalit sa kontrobersyal nga bakuna batok sa pneumonia.

Sa gidusong sworn affidavit sa naka on-leave pa nga Kalihim sa National Bureau of Investigation (NBI), nakabutang nga P601 milyon lamang ang nagasto sa gobyerno alang sa pneumococcal conjugate vaccine (PCV)-10 kun itandi sa mas mahal nga PCV-13 nga mokabat sa P833 milyon.

Giingong nisaka usab sa 423,000 ka masuso ang nakapahimos sa bakuna gikan sa orihinal nga target nga 300,000 benepisyaryo lamang.

Gibarugan ni Ona nga nahimong makatarungan ang iyang desisyon isip pangulo sa Philippine National Drug Formulary (PNDF) nga aprubahan ang PCV-10.

Kahinomdomang gi-imbestigahan sa NBI ang DOH kalabot sa pagpalit sa maong bakuna. (ecb/PIA7-Bohol)