Giprotestahan nga mga Balota Gipadala na sa Manila

Napadala na ngadto sa Manila ang kapin sa 100 ka ballot boxes nga gigamit sa eleksyon dinhi sa dakbayan kang kansang resulta giprotestahan nila ni kanhi Kongresista Tomas Osmeña ug kanhi Vice Mayor Joy Augustus Young.

Si Acting Cebu City Treasurer Diwa Cuevas mibutyag nga ang pagpadala nila sa Manila sa maong mga election paraphernalia gihimo tungod sa kamandoan gikan sa Comelec First Division nga nagsusi sa election protest nila ni Osmeña ug Young.

Ang mga opisyal sa Comelec First Division pinaagi ni Roseller Abad nga maoy acting commission clerk mihatag og mga lista sa 119 ka ballot boxes nga ang mga balota giprotestahan ni Osmeña.

Susama nga gidaghanon ang mga ballot boxes kang kansang mga sulod giprotestahan usab ni Young. Matud ni Cuevas nga dili susama ang tanang ballot boxes ang giprotestahan ni Osmeña ug Young, apan daghan hinoon niini ang susama ra.

Dinhi sa dakbayan sa Sugbo, miabot og 592 ka ballot boxes ang gigamit sa miaging eleksyon apan dili tanan niini ang giprotestahan nila ni Osmeña ug Young nga parehong gipilde nila ni Mayor Michael Rama ug Vice Mayor Edgardo Labella.

Ang mga sakop sa Comelec First Division maoy motimbang-timbang basi sa dukomento kon kinsa gayud ang tinuoray nga midaug sa miaging eleksyon.

Basi sa resulta, si Rama giproklamar nga mananaug kay milabaw og kapin sa 5,000 botos batok ni Osmeña samtang si Labella giproklamar usab nga mananaug sa iyang 184 botos nga labaw kay kang Labella.