Ginamit nga Tulda Nagsilbi nga Classroom

Duna’y pipila ka tunghaan sa kabukirang barangay sa dakbayan sa Sugbo nga dili pa gihapon angayan nga maklasehan tungod sa peligro resulta sa pag-isgo sa linog.

Tungod niini, si Cebu City Vice Mayor Edgardo Labella abtik nga nangolekta og mga ginamit nga “advertisement”, kanang lagpad kaayo nga tarpaulin/tulda nga nagpasundayag sa mga produkto sa lainlaing negosyante.

Ang Toong Integrated School, nga naglangkob sa mga tinun-an sa elementarya ug high school, gidad-an ni Labella kagahapon og dagko nga mga tulda nga magamit sa pagmugna og temporary classroom.

Matud ni Labella nga daghang mga advertising company ang misanong dayon sa iyang hangyo nga mohatag sila og mga dagko nga ginamit na nila nga advertisement aron gamiton nga tulda sa mga maestra.

Sa ingon nga paagi ang mga tinun-an makapahigayon gihapon og klase bisan og ang ilang mga classrooms dili pa maklasehan.

Mihangyo usab si Labella niadtong uban nga advertising company nga dunay mga wala na gamita nga dagkong karatola nga idonar nila kini sa kagamhanan sa dakbayan.

Matud ni Labella nga tukma ang gihimo sa mga magtutudlo nga wala mopugos sa pagpahigayon og klase sa mga classrooms nga dili pa luwas nga klasehan aron paglikay sa aksidente.

Dinhi sa dakbayan nagsugod na ang klase karong adlawa apan duna pay mga tunghaan nga ang ubang tinun-an wala pa klasehe tungod sa kakuwang og classrooms.

Sa Lahug Elementary School dunay mga classrooms nga wala klasehe ug gibanus-banos lang ang pagpahigayon sa mga klase sa mga tinun-an didto sa classroom nga giisip nga luwas.

Si Mayor Michael Rama miawhag usab nga kadtong mga classroom nga nahulagway nga kuwang og hagdan dili usa gamiton kay sigurado nga magkaguliyang ang mga tinun-an sa pagpanggawas kon mahitabo nga dunay laing linog.