‘Foreign Aid’ nga Madawat sa PH Human sa Bagyong Ruby, i-Account Tanan sa Gobyerno

Nagpasalamat ang Malakanyang sa international community sa ilang kaandam nga motabang sa mga naapektuhan sa bagyong Ruby.

Matud pa ni Deputy Presidential Spokesperson Abigail Valte, daghang mga nasud ug mga higala sa Pilipinas ang nipahayag na og kaandam nga mohatag og tabang sa mga typhoon victims.

Apil sa andam nga motabang sa Pilipinas ang Australia, Japan, Estados Unidos, Malaysia, Singapore, Canada, Brunei, Indonesia, Thailand, United Kingdom ug China.

Gawas pa niini, nipaabot na usab og suporta ang ASEAN Humanitarian Assistance Center, United Nations, International Maritime Organization, World Food Programme ug European Union.

Giingong aduna na usab military ug private assistance nga nadawat ang Pilipinas.

Giseguro ni Valte nga tanan nga sentimong tabang sa international community, i-account gayud sa gobyerno. (mbcn/ecb/PIA7-Bohol)