Fire Prevention Month Gisaulog sa Dakbayan!

(Cebu City PIO) – Subay sa temang, “Kaluwasan sa Sunog, Tun-an, Buhaton ug Atong Ikinabuhi,” ang kagamhanan ning dakbayan nga gipangulohan ni Mayor Michael Rama nagsaulog sa “Fire Prevention Month” ning tibuok bulan sa Marso karong tuiga.

Sa pakighinabi sa BARUGG News kang Cebu City Fire Marshall Rogelio Bongabong Jr. gitataw niini nga ang pagsa-ulog sa Fire Prevention Month dinhi gisugdan sa nationwide nga “Walk for a Fire-Free and a Fire-Safe Nation,” kagahapon Marso 1 gikan sa Bureau of Fire Protection Building sa dalan N. Bacalso paingon didto sa Fuente Rotunda.

Dugang gipasabot ni Bongabong nga adunay ipahigayon nga 2nd Cebu City Barangay Fire Olympics karong Marso 27, ug magpahigayon sila ug mga Fire Prevention and Awareness Campaigns sama sa mga Fire Drills, Poster-Making Contest sa mga eskwelahan, ug uban sa Prevention, Restoration, Order, Beautification, Enhancement kon PROBE Team ipahigayon ang pag-inspeksyon sa mga kalsada nga kinahanglan e-widening hilabina ang mga congested informal settlers area aron mas sayon ang pagresponde kung adunay alarma sa sunog.

“Akong gidapit ang mga Sugbuanon nga kanunayng mamahimong fire safety conscious sa ilang mga panimalay, gitrabahoan, eskwelahan ug sa tanang lugar ug mosunod sa mga fire prevention tips aron malikayan ang sunog,” asoy pa sa Fire Marshall ning syudad.

Samtang ang Cebu City Fire Station nagpahigayon usab ug mga Fire Prevention Awareness Campaign sama sa pagsalmot sa “City Hall at Your Doorsteps” nga programa ni Mayor Rama diin mohatag sila ug Fire Prevention Tips ug mga flyers ngadto sa mga katawhan alang sa paglikay sa sunog.

Lakip sa mga Fire Prevention Tips nga gilatid sa Cebu City Fire Station mao ang mosunod: ibutang ang numero sa Fire Department nga mao ang 160 duol sa inyong telepono; Limpiyohi ang inyong panimalay ug ilabay ang mga sagbot, mga papel ug uban pang mga butang nga dali nga masunog; Ibutang ang posporo sa lugar nga dili makab-ot sa mga bata; Ayaw ibutang ang lampara duol sa mga kurtina o sa lugar diin dali kini nga matumba, palunga kini sa dili pa matulog; Ayaw pagtago sulod sa balay ug mga butang o materyales nga dali masunog sama sa gasoline, alcohol o pintura.

Gikinahanglan usab nga regular nga ipatan-aw ang koneksyon sa inyong kuryente ug ipaayo lamang kini sa lisensyadong elektrisyan; Palunga ug tangtanga sa koneksyon ang tanang appliances nga de koryente kung wala na kini gamita; Ayaw pulihi ug sinsilyo, wire, o ubang klase sa metal ang mga nibuto na nga fuse; Palunga ang segarilyo ug siguraduha nga bugnaw ang sulod sa ashtrays sa dili pa kini ilabay. Ayaw panigarilyo nga naghigda; Palunga ang tanang kandila o lampara ug uban pang kagamitan sa balay nga nagamit ug kuryente o gas kung wala na kini gamita; Ayaw pasagdahi ang kaha kung ikaw nagluto o nagmantika; Ayaw ipadayon pagbutang sa pagkaon kung nag-aso na ang kaha. Palunga una ang stove ug pabugnawa ang mantika; Kung magkayo na ang kaha, tabuni kini ug basa nga panapton o tuwalya ug pabugnawa una sulod sa 30 ka minutos.

Dugang pa, mas maayo nga adunay fire extinguisher sa inyong panimalay kay makatabang kini sa pagpatay sa kayo ug maghatag ug higayon nga makatawag pa kamo sa fire department. makatabang usab kung planohon ang inyong escape route o agianan sapag-eskapo kung pananglit masunog na ang balay; Kalma lang ug ayaw ka ratol kung mahimo isarado ang tanang pultahan sa imong pagawas, makatabang kini aron malikayan ang madali nga pagkaylap sa kayo; Kung baga na ang aso, kamang padung sa gawas , tabuni ang ilong ug baba sa tuwalya o panapton nga gibasa; Pagawasa ang tanan ug ayaw na pagbalik sa sulod hangtod moingon ang bombero nga pwede na mobalik, ayaw pag-usik ug panahon sa paghipos sa inyong mga butang; ug gamit ang likod nga parte sa kamot, hikapa una kung init ba ng pultahan, kung init kini nagpasabot nga naa diha ang kayo.

Ang Dakbayan sa Sugbo adunay Siyam ka mga Fire Stations nga naglangkob sa Talamban, Lahug, Mabolo, Parian, Pahina Central, Sawang Calero, Labangon, Guadalupe, ug Poblacion Pardo, ug aduna usay Fire Brigades ug volunteers sa uban pang mga barangay. (Cebu City Public Information Office PIO/Greggy Jiggs P. Senados)