Fire Drill Ipahigayun sa mga Tulunghaan

Palapdan pa sa Bureau of Fire and Protection (BFP)-7 ang ilang kampanya aron malikayan ang pagtumaw sa sunog karong sunod bulan sa Hunyo atol sa pagbukas sa klase.

Kini tungod sa padayong nasinatian nga kainit sa panahon ug sa kanunay nga pagsaka sa temperatura matag adlaw.

Ang buhatan sa BFP-7 mipahibawo nga sa pagbukas unya sa klase sa Hunyo 2, ang ilang mga ginsakpan mopahigayon usab og fire drill sa eskwelahan, aron mahibawo ang mga kabataan sa angay nga buhaton kun motumaw ang sunog sa tulunghaan o kaha sa kabalayan nga gipuy-an niini.

Sa Syudad sa Sugbo, si City Fire Marshall Rogelio Bungabong miingon nga ang dakong katuyoan sa ilang fire drill sa eskwelahan mao nga mapahibalo ang kabataan kun unsa ka peligro ang sunog aron makatabang sila sa paglikay sa pagtumaw niini.

Nasayran nga sagad sa hinungdan sa pag-ulbo sa sunog mao ang wala maibot nga kuryente sa mga appliances o cell phone gikan sa outlet sa kuryente, pagpataka og labay sa upos sa sigarilyo ug usahay ang pagduwaduwa og pusporo sa mga bata.