Estudyante, Nahulog sa Sapa

Diriyot g’yud maamong ang kinabuhi sa usa ka utokan nga tinun-an sa University of the Visayas (UV) dihang natambog kini sa hugaw kaayo’ng sapa kilid sa dakung department store sa Colon.

Ang bata, dili lang ibutyag ang iyang ngalan tungod sa hangyo sa amahan, first honor sa Grade 5 sa UV, aksidente nga natambog sa sapa kay samtang siya naglakaw kaniadtong Martes sa miaging semana napandol siya og natulimbang.

Ang iyang amahan nga general manager sa usa ka kompaniya mitug-an sa sakop sa media adtong Lunes, kagahapon, nga giswerte gani kay aduna’y tawo nga dali kaayong nakatabang sa iyang anak.

Matud ni Guillermo Bayawa Jr., nagpuyo karon sa usa ka subdivision sa Dumlog, Talisay, nga nakaligo intawon ang iyang anak sa “yanang” kon hugaw kaayo nga lapok sa sapa.

Samtang wala tuod makainom og hugaw nga tubig ang bata apan nagkabulingit kini dihang gitabangan pagpakawas sa sapa. Ang gitawag og Parian Creek maoy sagad moawas og makamugna og lunop sa downtown.

Si Bayawa miingon nga nataligam-an sa mga opisyal sa dakbayan sa Sugbo ang pagbutang og ali daplin sa tulay nga aron unta malikayan nga adunay mahulog sa sapa.

Si City Engineer Jose Marie Poblete gikataho nga nasubo pagkasayod sa mao nga hitabo.

Matud sa taho sa Banat News, gipadad-an dayon ni Poblete og iyang sakop ang mao nga dapit kagahapon aron matan-aw kun unsay gikinahanglan aron mabutangan og ali ang sapa nga daplin sa karsada.

Image Credit: empire.com.ph