Ermita, Aduna na’y Eskuelahan

Ang Barangay Ermita dinhi sa dakbayan sa Sugbo makaangkon na gayud og bag-ong tunghaan nga pagatukoron sa Ramon Aboitiz Foundation Inc. (RAFI) aron dili na masakripisyo ang kabataan sa mao nga dapit.

Mokantidad og P13 milyones ang 12-classroom-school building nga pagatukoron sa RAFI diha sa 1,042 square meter nga luna nga iya sa dakbayan sa Sugbo.

Nagpirmahay og Memorandum of Agreement (MOA) sila si Mayor Michael Rama, RAFI President Roberto Aboitiz ug Dr. Rhea Mar Angtud sa Department of Education (DepEd), isip kabahin na sa pagtukod sa school building.

Matud ni Mayor Rama nga ang mao nga proyekto kabahin sa iyang gipasiugdahan nga Public-Private-Partnership (PPP) diin ang dakbayan maoy nanag-iya sa yuta, ang RAFI maoy motukod sa school building ug ang DepEd maoy modistino og mga maestra.

Si Dr. Angtud namahayag nga dul-an sa 800 ka tinun-an nga gikan sa Barangay Ermita ang anaa magtungha sa Cebu City Central School samtang duna sa’y uban nga mga bata sa Ermita nga tua magtungha sa tunghaan sa Barangay Pasil.

Apan nabantayan ni Dr. Angtud nga samtang adunay daghang elementary pupils nga gkan sa Ermita nga nagtungha sa City Central School, apan walay mga kindergarten pupils nga nagtungha.

Gitoohan ni Dr. Angtud nga tungod sa kalayo sa City Central School gikan sa Ermita, ang mga ginikanan wala na lang mopatungha sa kindergarten sa ilang mga anak aron paglikay sa kahasol paghatud-kuha sa mga bata.

Matud ni Ermita Barangay Captain Felicisimo “Imok” Rupinta nga dugay na nila kaayo nga gidamgo kining katukoran tunghaan sa Ermita.

Apan sanglit 12 ra man ka kwarto ang mao nga building nga tukoron nga libre sa RAFI, Grade 1 hangtud sa Grade III lang ang hatagan og priyoridad sa DepEd.

Image Credit: Cebu City PIO