Opinions
Epektibo ang Pangyamyam ni Mommy D
Dili nato mabasol si Mommy D (inahan ni Manny Pacquiao) kon siya atong nakit-an nga sama sa usa ka “magician” mihimo ug lihok nga nakapahibulong sa tanan kay nakuha man sa camera samtang nagpadayon ang sinukliay sa kumo ibabaw sa ring tali nila ni Pacquiao ug ni Bradley. Wa malilong ni Mommy D nga si Bradley gikataho sa pipila na lang ka semana sa di pa ang ilang panagsambunot nga siya kuno si Bradley di maligo ug usa ka semana ug gituhoan nga si Bradley dunay sekretong mga paagi tingali ginamit ang “black magic” aron pagseguro nga mapildi niya si Pacquiao.
Katingalahan ang maong pamahayag ug gani si Buboy Fernandez nga suod nga amigo ni Pacquiao mitubag nga, “Amo na siyang pakaligoon sa nag-aso-aso nga kinumo ni Manny aron mawagtang ang bisan unsa nga maligno nga iyang
gisaligan nganong di siya maligo.” Ug si Mommy D, sanglit inahan ni Manny, naninguha sab ug unsay iyang ikatugbang sa gipasiatab ni Bradley nga duna siyay sekretong tinagoan. Apan sa wa damha, daghang mikorte sa paghatag ug panahom gikan sa mga “bloggers” ug ilang gipasanginlan nga si Mommy D kuno usa ka “barangan.”
Mao nay giingon nga “battle of the nerves and mind.” Apan si Mommy D, sukwahi sa ilang gipamasangil wa igdungog nga usa ka “barangan” apan nahimo lang siya nga sapian tungod ug pinaagi sa “daw asero nga kinumo” sa iyang anak nga si Manny.
