Electronic Jeepney sa SRP, Gitun-an sa LTFRB-7

Gitug-an ni Land Transportation Franchising and Regulatory Board (LTFRB-7) Regional Director Ahmed Cuizon nga mahimo usab nga hatagan og ruta ang mga electronic jeepneys(EJ) sa South Road Properties (SRP).

Matud pa ni Cuizon nga gawas sa gisugyot nga bus route sa SRP, aplikasyon nga gisumiter sa tagdumala sa SM ngadto sa LTFRB, posibli usab nga mahatagan og ruta ang mga Public Utility Jeepney(PUJ) kun makaduso ang mga operator niini og application sa ilang buhatan.

Apan gisulti na nga daan ni Cuizon nga mo-agi pa kini sa makuting pagtuon tungod sa daghang komplikasyon nga nabantayan nila.

Giklaro ni Cuizon nga ang ilang buhatan bukas kaayo alang sa application sa EJ base sa sugyot ni Cebu City Councilor Gerry Carillo nga angay tugotang makadagan sa SRP paingon sa North Reclamation Area ug vice-versa.

Matud pa ni Cuizon nga panahon na karon nga motan-aw ang kagamhanan sa mga bag-ong teknolohiya nga makaayo usab sa kalikupan.

Alang kang Cuizon nga usa kini ka “step forward” kay wa magkinahanglan og gasolina ang maong sakyanan.

Gumikan kay bateriya ra ang ipadagan sa EJ, dili kini mobuga og abog sama sa krudo ug gasolina ug hinlo usab ang kalikupan.

Samtang gipasabot usab ni Cuizon nga dili mabalaka ang mga operator sa PUJ sa application sa hybrid bus kay dili man usab nila tugotan nga makaagi kini sa ruta sa mga PUJ.

Image Credit: www.eaglemotorcycles.net