Eksamin sa Mag-Drayber Usbon sa LTO

Bag-ohon sa Land Transportation Office (LTO) unya sa tuig 2015 ang eksaminasyon alang sa mga gustong mokuha og non-professional ug professional driver’s license.

Sa balita nga gi-email sa Philippine Information Agency (PIA) niining maong reporter, gikutlo niini ang pamahayag ni LTO Asst. Director Benjamin Santiago kinsa mibahad nga bag-onon nila ang mga test questions alang sa gustong mag-driver.

Sumala ni Elvira C. Bongosa sa PIA, nga dili na gamiton sa LTO ang daan nga test questions nga gigamit sa ahensya alang sa mga aplikante og lisensya sa pagpamaniho og mga behikulong de motor.

Matud pa ni Bongosa nga pinaagi sa pagbag-o sa mga test questions sa aplikante og lisensya, malimitahan na ang mga mopasar sa maong eksamin.

Miingon si Bongosa nga malimitihan usab ang gustong mag-drayber sa nasud.

Sa bahin usab ni Santiago sa LTO, nagkanayon kini nga usa sa napanid-an nila karon sa mga drayber mao ang matang sa kinaiya niini nga maoy hinungdan sa mga aksidente sa kadalanan.

Miingon si Bongosa nga usa kini ka paagi sa LTO aron ma-disiplina ang mga badlongon nga gusto lang mopadagan og sakyanan bisan walay hustong hiantigohan sa mga balaod bahin sa pagpadagan og sakyanan.

Midugang si Bongosa nga magpabilin nga walay kausaban ang bayranan sa maong eksamin kay tuyo lamang niini nga dili modaghan ang mga drayber nga walay panglangtaw sa pagprotiher sa kinabuhi.

Nasayran base sa rekord sa LTO nga mas daghan ang nakabsan sa kinabuhi kay nadasmagan sa motorsiklo nga gimaniho sa mga danghag nga mga drayber.