Edu Rama Gikatahon’ng Modumala sa Barangay Affairs

Si Konsehal Eduardo “Edu” Rama gikataho nga motrabaho gihapon sa Cebu City Hall kon mapupos na ang iyang termino pagka sakop sa konseho karong Hunyo 30.

Ang report nagkanayon nga si Konsehal Edu, ig-agaw ni Mayor Michael Rama, maoy padumalahon sa Barangay Affairs nga palapdan ang tahas apan ang Bando Osmeña Pundok Kauswagan (BOPK) mihulagway niini nga adunay bulok-pamolitika.

Samtang matud pa tumong sa administrasyon ni Mayor Rama nga molapad ang serbisyo sa City Hall ngadto sa kabarangayan pinaagi sa pagpalapad sa Barangay Affairs isip departamento, apan lahi ang panglantaw sa BOPK.

Mga suod ni Konsehal Edu Rama mitug-an nga kon matuman na ang plano, si Andy Borres nga karon maoy nagdumala sa Barangay Affairs mahimo na lang sakop ni Edu.

Ang mga opisyal sa BOPK miingon nga nakadawat sila’g report nga ang Team Rama nagplano nga si Edu maoy padaganon sa pagka kapitan sa Barangay Basak-San Nicolas atul sa nagsingabot nga barangay eleksyon.

Kon dili mauktaba, ang eleksyon alang sa mga opisyal sa barangay pagahimoon karong Oktobre.

Matud sa BOPK nga gituyo nga si Edu Rama maoy pahupton sa Barangay Affairs aron masuod siya pag-ayo sa mga kapitan sa barangay og sayon na lang alang kaniya ang pagdaug isip presidente sa Association of Barangay Councils (ABC) kon mahimo siya nga kapitan sa Basak-San Nicolas. Wala pa makuhai og pamahayag si Konsehal Rama kabahin niining maong isyu.