Ecleo Ipadakop

Ang huwes nga mikonbikto ni Philippine Benevolent Missionaries Association (PBMA) lider Ruben Ecleo Jr., napul-an na nga gipasagdan na lang sa kapolisan ug wala na pangitaa ang wanted nga kanhi kongresista.

Giawhag na g’yud sa hukmanan ang kapolisan nga dakpon sa labing dali nga panahon ang wanted nga si Ruben Ecleo Jr. nga nagpabiling nagtago-tago gikan sa mga tinugyanan sa balaod.

Si Regional Trial Court (RTC) Executive Judge Soliver Peras mihimo sa awhag diha nga giimbitar siya nga pinasidunggan’g mamumulong atol sa flag-raising ceremony sa Police Regional Office (PRO)-7 kagahapon.

Ang kanhi kongresista sa Dinagat Island, Surigao del Norte ug lider sa PBMA, gisilotan ni Judge Peras og life imprisonment human mamatud-i nga sad-an pagpatay sa iyang asawa nga si Alona kaniadtong 2002.

Nahimo’ng labing wanted nga kriminal sa tibuok nasud si Ecleo kay gawas sa pagka-konbikto niya sa kaso nga parricide, nakonbikto usab kini og kaso’ng pagpangawkaw sa Sandiganbayan.

Human tuguti si Ecleo nga makapyansa samtang nagpadayon ang husay sa iyang kaso nga parricide sa Sugbo, wala na g’yud mopakita si Ecleo sa hukmanan.

Si Judge Peras, usa ka military reservist nga naghupot og ranggo nga koronel, miingon nga kinahanglang maninguha ang kapolisan aron madakpan ang kanhi kongresista.

Ang headquarters sa PBMA nahimutang sa lungsod sa San Jose, Dinagat Island diin gituohan nga tua ra didto gitagoan si Ecleo sa iyang mga sakop.

Nadakpan si Ecleo kaniadto diha’ng gisulong sa kapolisan ang mansyon niini diin daghan ang nangamatay sa pinusilay tali sa mga polis ug sa mga sakop sa PBMA nga gitawag og “white angels.”

Si PRO-7 Deputy Regional Director for Operations Conrad Capa nga kanhi nangulo sa CIDG Task Force Tugis, miingon nga dili sila magpanuko pagdakop ni Ecleo kun ilang makit-an.