Duha Ka Binilanggo Nga Sakop Sa MNLF Gibantayan Sa Cebu City Jail

Duha ka binilanggo sa Cebu City Jail nga sakop sa Moro National Liberation Front (MNLF) ang gibantayan pag-ayo sa mga gwardya sa bilanggoan.

Kini maoy gibutyag ni Jail warden Johnson Calub dihang mireport siya ngadto sa mga sakop sa Police Coordinating Advisory Council (PCAC) kagahapon.

Matud ni PCAC Chairman Eugene Elizalde nga dili sila makabutyag sa ngalan sa duha ka binilanggo apan si Jail Warden Calub miingon nga tug-anan nila ang intelligence personnel sa kapolisan.

Si Calub nagkanayon nga ilang gimonitor kinsa ang mga tawo nga mobisita sa duha ka piniriso nga sakop sa MNLF nga anaa sa City Jail.

Gibutyag ni Elizalde nga kining duha ka binilanggo nga sakop sa MNLF nag-atubang kini og kaso didto sa Mindanao ug gibalhin lang sila pagpriso diha sa City Jail aron nga dili sila ma-rescue sa ilang kaubanan.

Ang mga sakop sa Moro Islamic Liberation Front (MILF) ang laing grupo sa mga rebelde’ng muslim naghimo karon og kagubot didto sa habagatang bahin sa Mindanao, mao nga gipanid-an nila kining duha ka binilanggo nga sakop sa MNLF.