Dugang Hagit sa Carbon Market

Giangkon ni Mayor Michael Rama nga dili pa g’yud angay’ng ipasigarbo ang Carbon Public Market bisan pa man og gipasiatab pag-ayo sa iyang market administrator nga hapsay ug limpyo na ang mao’ng merkado publiko.

Kini maoy rason nga gihagit pa sa mayor si Market Administrator Raquel Arce nga mohimo pa og paningkamot aron malimpyo ang merkado sa Carbon ug madasig ang katawhan nga anha na mangompra.

Matud ni Mayor Rama nga tukma ang sugyot nga angay’ng himoon ang kanunay’ng pagpanglimpyo sa karsada ug kanal diha sa Carbon market, ilabi na ang sawog sa merkado.

Ang kahugaw sa merkado diha sa Carbon, ilabi na ang presensya sa mga snatchers ug mangunguot, maoy nakapasamot nga
nakapaidlas sa mga pumapalit.

Nabantayan sa mga reporters nga ang kanal sa Carbon Market baho kaayo, ilabi na ang mga bukog sa kahayopan nga anha ra usahay ilabay kilid sa dalan F. Escaño nga likud sa Carbon Police Station.

Si Rama miingon nga tukma ang sugyot nga ang mga trak sa bombero nga gipanag-iya na sa dakbayan mahimo’ng gamiton aron pasiritan og tubig ang karsada sa Carbon, ilabi na ang mga kanal ug sawog sa merkado.

Matud sa mayor nga dili mahitabo ang pangandoy nga mahimo nga tourist attraction ang Carbon Market kun magpabilin ang iyang sitwasyon.