Dugang 26 Hektaryas nga Luna sa SRP Paliton sa SM

Ang SM Prime Holdings Inc. nagtinguha karon nga mopalit og dugang 26 hektaryas nga kayutaan diha sa South Road Properties (SRP).

Kini maoy gibutyag ni City Administrator Jose Marie Poblete ug City Hall consultant Joey Daluz III atul sa gipahigayong budget hearing kagahapon.

Matud ni Poblete nga tag P16,000 ang assessed value sa matag metro kwadrado sa maong yuta apan ibaligya nila kini sa tag P20,000 matag metro kwadrado.

Si Poblete miingon nga kung mahalin ang 26.3 hektaryas nga kayutaan, ang dakbayan mokita og kapin sa lima ka bilyon ka pesos nga magamit paggasto sa mga proyekto nga gihan-ay sa annual budget karong sunod tuig.

Ang P10.4 Bilyones nga Annual Budget nga gisugyot ni Rama para sa sunod tuig ang P4 Bilyones ra maoy anha kolektahon sa buhis, samtang ang P6 bilyones gikan sa halin sa kayutaan.

Ang maong yuta nga ibaligya sa dakbayan mao kadtong dakung hawan nga diha gipahigayon ang nasudnong misa-pasalamat sa pagkahimo nga santos ni San Pedro Calungsod.

Si Daluz miingon nga “cash basis” ang pagbaligya sa dakbayan sa yuta og nagpasabot nga atul sa pagpirmahay unya sa Deed of Sale, ang makapalit mohatag og katunga sa kinatibuk-an nga kantidad samtang ang katunga unya ihatag kon ma-release na ang titulo ngadto sa nakapalit.

Si Konsehal Margarita “Margot” Osmeña mipahinumdom nga si Mayor Michael Rama misaad nga ang dapit nga gihimoan sa national thanksgiving mass para kang San Pedro Calungsod ipagamit atul sa Eucharestic Congress diin hayan moanhi ang Santo Papa.

Kon mapalit sa SM ang maong entero luna nga nahimutang unahan sa Viaduct diha sa Barangay Dulho-Fatima ug Mambaling, ang SM maoy dunay labing daku og katigayonan diha sa SRP.

Ang SM nakapalit usab og 34 hektareyas nga kayutaan diha sa SRP nga maoy gitukoran nila karon og higante nga mall nga pagailhon unya nga maoy labing daku nga mall sa tibuok asya.