Dugang 10 ka Garbage Truck Gikan Japan, Dawaton sa Syudad

Ang dakbayan sa Sugbo makaangkon na usab og dugang 10 ka garbage truck nga ihatag sa mga opisyal sa Yokohama City, Japan isip kabahin sa panagsuod sa mga opisyal sa duha ka nasud.

Ang mga sakop sa Cebu City Council wala mosupak nga ang kagamhanan sa dakbayan sa Sugbo makagasto og kapin sa walo ka milyon ka pesos alang sa pagpadala dinhi sa maong mga trak sa basura.

Kon moabut na dinhi sa dakbayan ang maong mga trak sa basura nga ihatag sa mga opisyal sa Yokohama, Japan kapin na sa 50 ang mga garbage trucks sa dakbayan.

Si Konsehal Margarita “Margot” Osmeña, pangulo sa committee on budget and finance, maoy mirekomendar nga uyonan sa konseho ang paggasto sa kapin sa walo ka milyon ka pesos.

Apan daghan ang nakabantay nga bisan og sa pagka karon ang dakbayan duna nay kapin sa 40 ka garbage truck apan daghan gihapon ang mga basura nga dili mahipos sa lainlaing dapit.

Matud ni Engr. Dionesio Gualiza nga maoy hepe sa Department of Public Services (DPS) nga ang mga basurero sa kabarangayan angay usab nga moabag sa paghipos sa ilang mga basura.

Ang dakbayan sa Sugbo migasto og minilyon ka pesos matag buwan aron paghatag og dugang honoraryom sa mga barangay garbage collectors.

Ang kasabutan sa paghatag sa City Hall og dugang honoraryom sa mga barangay garbage collectors mao nga kinahanglang nga sila moserbisyo og walo ka oras sa pagpanglimpyo sa ilang barangay.