DTI Nagmonitor sa Prisyo sa Construction Materials

Ang Department of Trade and Industry (DTI-7) hugot nga nagmonitor sa prisyo sa mga construction materials niining panahona.

Gipasabot ni DTI-7 Regional Director Asteria Caberte nga sa panahon sa ting-init daghan ang magpatukod og building ug mga kabalayan tungod kay dili man mabalda ang construction sa uwan.

Gitumbok ni Caberte nga kun taas ang demanda sa mga construction materials, may posibilidad nga pahimuslan sa mga tag-iya sa mga hardware ang kahigayonan pinaagi sa pagpasaka sa prisyo sa ilang mga baligya.

Si Caberte miingon nga ilang gipaabot nga unang mosaka ang prisyo sa semento ug kabilya kay mao kini ang nag-unang materyales sa pagtukod og balay o edipisyo.

Sa higayon nga ilang masuta nga may dili makiangayon nga pag-usbaw sa prisyo sa mga construction materials, si Caberte nagkanayon nga ilang padad-an og sulat ang tag-iya sa hardware aron mopasabot sa hinungdan sa pagsulbong sa prisyo sa mga produkto nga gibaligya niini.

Sigon pa ni Caberte nga ilang pahamtangan og tukmang silot ang mga negosyante og hardware kun masuta nga dili makiangayon ang gihimo niini, sama sa ilang gihimo niadtong mapahimuslanong mga magpapatigayon nga mipasaka usab sa ilang prisyo sa mga baligya human sa linog ug sa bagyong Yolanda sa miaging tuig.

Hinuon iyang gipahibawo nga sa pagkakaron ang ilang buhatan wala pa makamatikod nga nilihok ang prisyo sa construction materials.

Apan iyang giawhag ang mga konsumedor nga moreklamo dayon sa ilang buhatan kun may mamatikdan kining kalit nga pag-usbaw sa prisyo sa construction materials aron makahimo dayon sila og tukmang aksyon, sumala ni Caberte.