DTI-7 Miawhag sa mga Tindahan Pagsalmot sa Bagwis Award

Ang Department of Trade and Industry (DTI) miawhag sa mga tindahan sa rehiyon 7 sa pagsalmot sa “Bagwis” Seal of Excellence Awards 2014.

Matud pa ni DTI Central Visayas Regional Director Asteria Caberte, “ang usa ka tindahan nga magtangag sa DTI Seal of Excellence maoy usa ka responsabling establisemento nga nagmatngon sa katungod ug kaayohan sa mga konsumedor”.

Ang pagpamatuod sa “Bagwis” (terminolohiya sa balhibo sa pako) Seal of Excellence maoy kabahin sa programa sa Bagwis sa DTI ug usa sa labing gipatuman sa nasud sa pagproteher sa mga consumedor nga giila sa Association of Southeast Asian Nations (ASEAN) ug sa Asean Committee on Consumer Protection (ACCP).

Ang DTI Bagwis usa ka Certified Establishment Program (Bagwis Awards) nga gitumong aron labing mapauswag ang panaghiusa ug sa pagpaila sa taas nga pagtahud sa mga pamaagi sa pamatigayon alang sa makiangayon nga merkado pinaagi sa paglusad og kinaugalingong disiplina ug serbisyo nga tinarong.

Midugang si Caberte nga ang maong programa moila sa mga balay patigayon nga nagpakita og serbisyo nga kasaligan ug kaantigo molaban sa katungod sa iyang mga kustomer.

Ang silyo sa Bagwis maoy mogiya sa mga konsumedor ug mopasalig sa luwas nilang pagpamalit sa mga de kalidad nga produkto ug nga walay mausik nila nga kuwarta.

Ang establisemento nga may silyo sa Bagwis , nagpaila nga ceretipikado sa DTI.

Sa pagkakaron, ang maong silyo sa Bagwis giklasipikar isip gold, silver ug bronze.