DTI-7: Bogo ug Daanbantayan May BAC Na

Aduna nay mga Business Assistance Centers (BAC) na karon ang syudad sa Bogo ug lungsod sa Daanbantayan, matud pa ni Regional Director Asteria Caberte sa Department of Trade and Industry (DTI) 7.

Ang maong mga lugar pulos naapektohan sa bagyong Yolanda nga mihaguros sa maong naasoy’ng lugar sa miaging tuig.

Sumala ni Caberte nga ang dugay na nga gilaraw nila nga BAC maoy magsilbing sanga nga buhatan sa DTI ug mopatuman sa mga nag-unang proyekto sa kagamhanan sa maong mga lugar.

Dugang pa niya, nga ang maong mga BAC sa Bogo City ug lungsod sa Daanbantayan motabang sa pagmugna ug pagpalambo sa kadugtungan sa mga local government units (LGUs) ingon man sa pagpahigayon og konsultasyon sa mga panginahanglanon sa business sector ug sa pag-ayuda nga dali kining mapatuman.

Si Bogo City Mayor Celestino Martinez ug Daanbantayan Municipal Mayor Augusto Corro kinsa nalipay kaayo sa maong lakang sa DTI, mipakita sa dako nilang suporta sa maong ahensya.

Gituohan sa maong mga lider nga makatabang kaayo kini og dako sa kauswagan sa ilang tagsa-tagsa ka lugar ug kasikbit nga mga lungsod pagpauswag ug pagpalambo sa ilang mga pamatigayon.