DSWD, Nipasidaan Batok sa mga Pekeng Enumerator

(PIA-7) — Ang Department of Social Welfare and Development (DSWD) nipasidaan sa publiko batok sa “bogus” o pekeng enumerators nga mangilkil og salapi gikan sa mga pamilya isip hulip sa saad nga i-apil sila nga benepisyaryo sa Pantawid Pamilyang Pilipino Program.

Kini human ang DSWD-Field Office IV-A nakadawat og taho nga adunay indibidwal nga giingong nagpahimos sa nagpadayong assessment sa mga kabos nga pamilya ubos sa Listahanan o ang National Household Targeting System for Poverty Reduction (NHTS-PR) sa Maragondon ug Magallanes sa Cavite.

Ang Listahanan usa ka information management system nga magtino kinsa ug asa nahimotang ang mga kabos.

Kini gamiton sa paghimo og komprehensibong database sa mga kabos nga pamilya alang sa nasudnong ahensiya sa gobyerno ug ubang social protection stakeholders isip basehan sa pagtumbok sa mga programa ug serbisyo sa social protection.

Ang Listahanan nipahigayon na karon sa ikaduhang hugna kun 2nd round sa nationwide assessment nga adunay 15.3 milyong target households o kabalayan.

Base sa inisyal nga imbestigasyon sa DSWD-Field Office, ang modus operandi mao ang pagpa-ila sa mga pekeng enumerators isip mga empleyado sa DSWD ug mangolekta og P20 gikan sa mga miyembro sa panimalay ug magbilin og pasalig nga i-apil sila sa listahan sa posibleng benepisyaryo sa mga programa sa gobyerno.

Gitataw sa DSWD nga ang opisyal nga enumerators nagsuot og opisyal nga Listahanan IDs nga may hulagway, pangalan ug lagda sa ilang DSWD Regional Director. Ang mga enumerators nagpahigayon og house to house interviews gamit ang Family Assessment Form (FAF) nga adunay watermark sa DSWD logo sa tunga-tunga sa maong papel.

Ang DSWD mi-awhag sa publiko sa pagpangayo sa ID number sa mga enumerators. Kun may reklamo sila kalabot sa validation, mahimo nilang ihatag ang ID number ngadto sa Listahanan office aron ma-verify sa DSWD ang maong reklamo alang sa tukmang aksiyon.

Gi-awhag ang publiko sa pagtaho kun may susama niining insedente sa pinakaduol nga buhatan sa DSWD o tawag lang sa Listahanan pinaagi sa voice hotline number (02) 717-3770 local 88876. Mahimo usab silang mopadala sa ilang mga reklamo pinaagi sa text ngadto sa text hotline number 0918-9122813 ug e-text lamang ang Listahan<space>name<space>location<space>grievance/inquiry. Mahimo usab mo-email pinaagi sa ask.listahanan@dswd.gov.ph o sa ilang official Facebook page www.facebook.com/listahanan.official. (mbcn/ecb/PIA7-Bohol)