DSWD Nakadawat og Donasyong Motorsiklo

Lima ka mga bag-o o brand new nga motorsiklo ang gitunol ngadto sa Department of Social Welfare and Development, Field Office VII (DSWD-7) dili pa dugay pina agi sa Kawasaki Motors Philippines Corporation (KMPC) nga gipangunahan sa tsirman ug Presidente nga si Jin Inoue.

Ang maong mga motorsiklo gihatag sa Kawasaki alang sa mga lugar nga gilampurnas sa bagyong Yolanda sa amihanang bahin sa lalawigan sa Sugbo.

Sumala ni Simeon A. Remata, usa sa mga tigpamaba sa DSWD7, nga ang usa ka yanong seremonyas ang gipahigayon sa maong turn-over didto sa buhatang rehiyonal sa DSWD7 sa Barangay Carreta ning dakbayan sa Sugbo, diin si DSWD Assistant Regional Director for Administration Marcial G. Fernandez nagpasalamat ngadto sa hugpong sa mga negosyante gumikan sa maong donasyon.

Matud pa ni Remata, gibutyag ni Fernandez ngadto sa media nga nalipay kaayo siya nga gihatagan sa Kawasaki Motors Philippines ang mga buhatan sa DSWD sa maong mga sakyanan.

Sumala ni Remata nga nakaingon si Fernandez nga kining panag-uban o partnership sa kagamhanan ug sa pribadong negosyente labing makapadas-og sa serbisyo sa kagamhanan alang sa katawhan.

Miingon si Remata nga ang DSWD national office, ug ang Kawasaki Motors, miila sa local government units sa Bogo City, mga lungsod sa Medellin, Daan Bantayan ug Bantayan isip benepisyaryo sa maong donasyon.

Matud pa niya nga si KMPC Territorial Sales Specialist Mark Arvin Capalla nagkanayon nga ang mga donasyong motorsiklo giapud-apod usab sa ubang bahin sa Kabisay-an kay gusto ni Capalla nga kahatagan usab sa maong mga motorsiklo ang ubang bahin sa Kabisay-an .

Gani matud pa ni Remata nga 6 na ka motorsiklo ang gihatag nila ni Capalla didto sa Iloilo City, 8 sa Tacloban City ug usa sa DSWD Central Office sa miaging semana.