DSWD Miabag sa Proyekto sa BFAR

Gipahibawo sa Bureau of Fisheries and Aquatic Resources (BFAR) – 7 nga ang Department of Social Welfare and Development (DSWD-7) miabag usab sa ilang proyekto sa pagpanghatag og mga pump boats ngadto sa mga mangingisda sa amihanang bahin sa lalawigan sa Sugbo nga nabiktima sa bagyong Yolanda.

Sigun pa ni BFAR-7 Regional Director Andres Bojos nga ang mga opisyal sa DWSD-7 miuyon nga sila maoy mobayad sa sweldo sa mga panday nga ilang gipatrabaho sa mga pumpboats nga ilang gipanghatag ngadto sa mga mananagat nga apektado sa bagyo. Kini pinaagi sa cash-for-work program sa DSWD-7 nga nagtinguha nga makatabang aron mobangon ang panginabuhi sa mga nabiktima sa bagyo sa amihanang bahin sa Sugbo.

Matud pa ni Bojos nga dako kaayo kini og ikatabang sa ilang pagtuman sa “build a boat project” alang sa mga mananagat nga apektado sa bagyo tungod kay mas madali na lamang sa ilang buhatan ang paghuman sa 5 mil ka mga pumboat alang sa naasoy nga benipisaryo.

Ang Disaster Risk Reduction and Management Focal Person sa DSWD-7 Jenny Abastillas mikonpirmar nga ang ilang buhatan nakig-alayon sa BFAR sa naasoy nga programa.

Apan iyang gitataw nga ang ilang cash-for-work program nga ibayad sa suholan sa mga panday sa pump boats, ipaagi sa Local Government Units sanglit mao man kini ang nalatid sa ilang programa.

Iyang gitataw nga ang ilang ibayad nga suhol sama sa ilang gipatuman nga livelihood sa mga biktima sa bagyo, ibase sa minimum nga suhol dinhi sa lalawigan nga gitakda sa Department of Labor and Employment (DOLE)-7.

Image Credit: www.michaeldsellers.com