DSWD, Habitat for Humanity, Manguna sa Housing Project sa Bohol

Nakig-abin ang mga ahensya sa kagamhanan sa usa ka pribadong organisasyon sa pagtukod sa kapin sa 8 mil ka lig-on nga balay nga moagwanta sa mga katalagman didto sa lalawigan sa Bohol.

Si Leah Quintana, information officer sa Department of Social Welfare and Development(DSWD)7 nagkanayon nga ang Bohol provincial government ug Habitat for Humanity ug DSWD7 gitakda nga mopatuman sa Core Shelter Assistance Project (CSAP) nga mopabarug sa mokabat og 8,083 disaster-resistant houses alang sa mga pamilya sa Bohol kansang kabalayan pulos hingpit nga nagusbat sa pagtay-og sa 7.2-magnitude nga linog niadtong Oktobre 15, 2013.

Matud ni Quintana nga ang CSAP maoy mopanday sa gitawag nga environment-friendly, ug lig-on nga mga estraktura nga mobarug batok sa 220-kilometro matag oras nga gikusgon sa hangin ug linog nga may gikusgong intensity four ug uban pang katalagman nga mugna sa kinaiyahan.

Matag balay nga tukoron mokantidad og P88,000 ug ang iyang kalig-on gisandig sa iyang desinyo ug sa mga materials nga gamiton.

Tungod kay ang maong proyekto usa man ka hiniusa nga proyekto sa DSWD ug sa Habitat for Humanity, ang DSWD maoy moabaga sa kantidad nga P70,000 samtang ang Habitat mohatag og P18,000 isip counterpart alang sa matag usa ka balay nga tukoron.

Nagkanayon si Quintana nga ang maong housing project mokantidad og P711, 304, diin ang P565,810 iya sa DSWD ug sa Habitat.

Gani matud pa ni Quintana nga ang DSWD mitunol na ngadto sa maong grupo sa mokabat og P371-milyones isip pasiunang kantidad sa iyang gastohanan.

Miingon si Quintana nga sa 17 ka lungsod sa Bohol nga nasabak pag-ayo sa katalagman, ang Loon maoy labing daghan og kabalayan nga hingpit nga nagusbat nga mikabat ang tanan og 1,255, gisundan sa Sagbayan nga may 1,035, ug sa Maribojoc, 1,033.

Midugang si Quintana nga si Bohol Gov. Chatto nagpasalamat sa Aquino administration gumikan sa padayong hinabang nga gibubo niini sa lalawigan luyo sa kadako pa usab nga ayuhonon didto sa Eastern Visayas.