DSWD-7 Nagkinahangla’g 800 Kapin ka Trabahante

Mokabat sa 800 kapin ka mga trabahante ang gikinahanglan sa Department of Social Welfare and Development (DSWD)-7 sugod karong Mayo ning tuiga alang sa gipalapdan nila nga National Community Driven Development Program (NCDDP).

Sumala ni Regional Social Marketing Manager Simeon A. Remata III sa DSWD-7 nga nagsugod na sila karon sa pagpanawat og mga aplikante.

Miingon si Remata nga sa 806 ka aplikante nga madawat, 72 niini maoy area coordinator, 93 ka deputy area coordinator, 93 ka financial analyst, ug 548 ka community facilitators.

Midugang si Remata nga ang area coordinator nga may salary grade(SG) 18 kun P32 mil matag buwan nga suweldo, kinahanglang gradwado sa upat ka tuig nga kurso nga may labot sa social development course.

May lima ka tuig nga kasinatian sa trabaho, diin tulo niini ka tuig sa supervisory position ug duha usab sa development assistance projects.

May katakus nga modumala og grupo ug kapabilidad sa pagdumala og mga proyekto.

Nakasinati na og training kun bansay-bansay nga balig 40 oras, may abilidad sa panulat ug sa pagsulti, kaantigo sa paggamit sa computer, ug may gugma nga mobiyahe sa asa man nga destino dinhi sa Central Visayas.

Matud pa ni Remata nga ang tanang trabahante maoy modumala sa mga survey sa tanang barangay nga giila sa DSWD nga labing kabus sa rehiyon.

Kini nahisakop usab sa 72 ka mga lungsod sa upat ka lalawigan nga mao ang Bohol, Cebu, Negros Oriental ug Siquijor.

Usa sa ilang suhitoon mao sa ilang survey mao ang mga proyekto nga infrastraktura nga gikinahanglan sa matag barangay nag gituohang makapauswag sa pagpuyo ug panginabuhi sa katawhan.

Una niini gibutyag ni Remata nga may gigahin na ang kagamhanan sa nasud nga salapi matag barangay alang sa maong mga proyekto.

Matud pa ni Remata nga bukas na karon ang DSWD-7 nga modawat sa mga application gikan sa mga aplikante.

Mahimo usab nga i-hatud ang ilang aplikasyon sa email address nga kc_me_regionvii@yahoo.com/melaisullano@yahoo.com o kaha mokontak sa bisan asang numero sa telepono sa Kalahi-CIDSS nga (032) 232-6581 o 232-9509 loc. 123 alang sa inisyal nga screening.