Drugtest sa Dili Pa i-renew sa Trabaho

Ang mga opisyal sa kabarangayan dinhi sa dakbayan sa Sugbo giawhag nga isumiter g’yud usa nila og drugtest ang ilang mga kawani sa dili pa kini renyohan sa ilang employment contract.

Mao kini ang awhag ni Dr. Alice Utlang, hepe sa City Office for Substance Abuse Prevention (COSAP), human nga may duha na usab ka kawani sa Barangay Zapatera ang napositibo sa gidili’ng drugas diha nga gihimoan sila og drugtest.

Matud ni Utlang nga ang mga opisyal sa Zapatera miawhag kanila nga kuhaan og drugtest ang ilang mga kawani aron maoy basehan kun kinsa kanila ang dili na angay’ng papadayonon sa pagtrabaho.

Si Utlang miingon nga nagkasabot na sila si Tisa Barangay Captain Philipp Zafra, president sa Association of Barangay Councils (ABC) nga kini maoy himuon sa mga opisyal sa barangay.

Nahibaw-an hinuon nga dunay mga opisyal sa barangay, sama ni Kapitan Joel Garganera sa Barangay Tinago, nga wala motaktak sa upat niya ka kawani nga napositibo sa gidili nga matang sa drugas kaniadto’ng imaging tuig.

Ang gihimo ni Garganera lahi kaayo sa gihimo ni Kapitan Rey Ompoc sa Barangay Mabolo nga diha-diha nga gitangtang sa ilang trabaho kadto’ng lima ka kawani sa iyang barangay nga namatud-an nga adik sa gidiling drugas.

Sa imaging semana, upat ka kawani sa City Hall nga naglakip sa usa ka regular, ang napositibo usab sa shabu. Ang tulo kanila irekomendar sa COSAP nga taktakon sa trabaho u gang regular nga kawani imbestigahon.

Si Mayor Michael Rama daan na nga miingon nga dili siya ganahan nga makig-uban og trabaho sa mga adik.