Drayber nga Badlongon Wala nay Ipsot

Ang mga drayber nga madakpan sa mga traffic enforcers dinhi sa dakbayan sa Sugbo dili na g’yud makalingkawas sa ilang bayranan nga multahan kay ang City Traffic Operations Management (CITOM) nakigtambayayong na sa Land Transportation Office.

Si CITOM operations officer Joy Tumulak miingon nga miuyon ang kadagkoan sa LTO sa ilang hangyo nga ang lisensya sa mga drayber nga madakpan dili ihatag pagbalik gawas kun makapakita sila og certification gikan sa CITOM nga wala sila’y multahan nga wala kabayari.

Matud ni Tumulak nga ang mga drayber nga maisyohan sa CITOM og traffic citation ticket mapugos na g’yud sa pagbayad sa ilang multahan kay kun sila madakpan sa LTO ug masakmit ang ilang lisensya dili man nila kini makuha pagbalik kun aduna sila’y pending violation sa CITOM.

Sagad sa mga drayber nga maisyohan lang og traffic citation ticket dili gayud magtagad pagbayad sa ilang multahan kay ang ilang lisensya dili man sakmiton sa mga traffic enforcers.

Daghan kaayo nga mga drayber ang madakpan ug maisyohan og traffic citation tickets apan pipila ra kanila ang mobayad sa ilang multa.

Ang CITOM legal department dili usab dayon makapasaka kanila og kaso ug adunay uban nga maabtan na lang sa paglapas sa reglementary period.

Ang mga eksperto sa balaod nagkanayon nga ang madakpan sa paglapas sa balaod sa trapiko dili na mahimo nga konbiktohon kun dili kini mapasakaan og kaso sulod sa duha ka buwan.

Samtang matud ni Tumulak nga gisugdan na nila pagpangita kadto’ng 45 ka drayber nga ilang gipasakaan og kaso unya nalutsan og warrant of arrest.

Awhag ni Tumulak nga kadtong mga drayber nga naisyohan og traffic citation ticket sa mga traffic enforcer moadto g’yud sa Traffic Violations Bureau (TVB) aron maasikaso ang ilang obligasyon ug dili sila mapasakaan og kaso.