Dragon Boat Kompetisyon Lakip Sa Mandaue Business Month 2022

Sa labing unang higayon, ang dakbayan sa Mandaue maoy mamahimong host sa umaabot nga Dragon Boat Competition karong Agosto 20, 2022. Ang maong kalihukan ipahigayon sa Mandani Bay nga nahimutang gihapon sa maong dakbayan, diin 50 ka mga partisipante ang nalakip niini.

Nasayran nga adunay 5 ka kategorya ang kompetisyon, mao kini ang open, mix category, youth, masters category ug ingon man ang mix category for long boat.

Matod ni Enrique Sanchez, ang internal race secretary sa maong kompetisyon nga gilauman nila nga adunay 15 ka mga koponan kun partisipante apan posible pa kining musaka ngadto sa 20 sanglit nagpadayon pa gihapon ang registration. Dugang pa ni Sanchez nga wala pa kini labot sa mga LGU nga posibleng mu apil niini, ug gibana-bana sab nga muabot kini ug 20 ka mga barangay.

Ang Dragon Boat Competition 2022 lakip sa mga kalihukan ubos sa Mandaue Business Month (MBM) 2022 ug nakigtambayayong sab kini sa Philippine Accessible Disability Services, Inc. (PADS), Mandaue Chamber of Commerce and Industry ug Mandani Bay.

Nasayran sab nga mao kini ang labing unang cross disability adaptive dragon boat racing program sa nasud.

Ang pipila sa mga partisipante nag gikan mismo sa Sugbo apan aduna say nag gikan sa dakbayan sa Dumaguete ug sa Manila ngadto sa kaulohan.