DPWH Mipasalig Humanon og Putol ang mga Kahoy

Gipasalig sa Department of Public Works and Highway (DPWH) 7 nga mahuman sa ilang buhatan ang pagpamutol sa tulo na lamang ka Acacia sa syudad sa Naga karong adlawa.

Si DPWH-7 Regional Director Ador Canlas mipasalig nga ila gyud nga mahuman ang pagpamuril sa mga karaang kahoy nga naglandong sa national highway sa barangay Langtad ug Inuboran sa maong dakbayan.

Miingon si Canlas nga gituyo nila ang pagsugod og pamutol sa alas 9:00 sa gabii hangtud sa alas 3:00 sa kaadlawon kay menus ang mga motoristang mangagi.

Hinuon, matag duha ka oras gituyo usab nilang mamahuway sila aron makaagi ang mapundo nga mga sakyanan sa masig-kahabig.

Sa samang higayon makapahuway usab ang mga trabahante samtang magbantay nga mahuman na ang hut-ong sa mga sakyanan nga mopaingon sa Carcar ug sa dakbayan sa Sugbo.

Nasayran nga tungod sa kadaghan sa mga motorista nga nahasol sa pagpamutol sa mga karaang kahoy kun maadlaw, miuyon ang Department of Environment and Natural Resources (DENR) 7 nga ibalhin ang pagpamutol niini sa panahon sa kagabhion.

Ang maong kalihukan gibantayan usab sa mga kapolisan sa syudad sa Naga aron malikayan ang paglabang-labang sa mga tawo ug mga sakyanan samtang wala pa moabot ang tukmang oras alang sa pagpalabang kanila.

Ang pagpuril sa mga karaang kahoy sa daplin sa karsada sa habagatang bahin sa lalawigan sa Sugbo nauyonan sa DENR, DPWH, mga lokal nga opisyal sa kagamhanan tungod sa kapeligroso niining mga kahoya sa kinabuhi sa tawo ug kabtangan.

Wala na nila tagda ang mga protesta sa ubang mga grupo.