‘DPWH Mananghid sa DENR-Manila Kun Moputol og Kahoy’

Gimandoan sa Department of Environment and Natural Resources (DENR) 7 ang Department of Public Works and Highways (DPWH) 7 sa pagpangayo og clearance gikan sa ulohang buhatan sa DENR aron dili na sila ma-kuwestion sa putlonon nilang mga kahoy didto sa dapit sa habagatan.

Gipasabot ni DENR7 Regional Director Isabelo Montejo nga andam mohatag og permiso si Environment Secretary Ramon Paje alang sa putlonon nga 41 ka punoan sa mga kahoy lakip na ang tag-100 na ka tuig kapin kun kulang nga mga acasia.

Kining mga kahoya anaa sa daplin sa national highway sa lungsod sa San Fernando nga apektohan sa road widening project sa DPWH7.

Gipasabot ni Montejo sa iyang sulat ngadto kang Paje nga ang mga putlonon nga kahoy naghatag og hulga sa kinabuhi sa mga motorista ug sa molupyo sa maong lungsod.

Gani gisukip ni Ontejo sa iyang sulat ang inspection report ni DENR7 Forester Filimon Embalzado kinsa maoy misusi sa kahimtang sa maong mga kahoy.

Sumala ni Montejo nga nagkagabok na ang mga punoan sa maong mga kahoy hinungdan nga dali na lang kining matumba sa higayon nga masabak sa kusog nga hangin.

Kauban sa sulat ni Montejo ang sulat hangyo usab ni San Fernando mayor Antonio Canoy alang sa dinaliang pagputol sa maong mga kahoy.

Gipataban usab niini ang certifipiko kun pagpamatuod sa mga barangay officials nga miuyon sila sa maong lakang.

Ang DENR-7 mitakda sa Agusto 1-4 sa pagpamutol sa maong mga kahoy sa lungsod sa San Fernando bisan wala pay kasayoran kun misanong ba ang DPWH sa ilang mando.