DPWH-7 Patamnon og 8 Mil ka Kahoy

Gimanduan sa Department of Environment and Natural Resources (DENR)-7 ang Department of Public Works and Highway (DPWH)-7 nga patanomon og 7,900 ka punoan sa kahoy sa dili pa nila libkason ang giluwat nga Cease and Desist Order.

Sumala pa ni DENR-7 Regional Executive Director Isabelo Montejo nga nagpadala mismo ang iyang buhatan og sulat ngadto kang DPWH-7 Regional Director Ador Canlas agi og tubag sa gihangyo sa naulahi nga ipalibkas na ang ilang cease and desist order.

Kini human panglarota ug pamutola ang dul-an sa 100 ka punoang kahoy sa center island sa Sergio Osmeña Boulevard ning syudad sa Sugbo. Ang maong karsada kasamtangang giayo sa DPWH kinsa mikuha sa WT Construction isip contraktor sa maong proyekto.

Sigon pa ni Montejo nga ang maong gidaghanon sa kahoy nga ipatanom maoy silbing hulip sa gipanglarot nga mga punoan gikan sa center island sa maong karsada.

Gani natala sa Revised Presidential Decree No. 705 nga mao ang “The Forestry Reform Code of the Philippines nga kinahanglang adunay 100 porsento nga mabuhi sa ipananom nga mga seedlings. Kini pinaagi sa pagmonitor sa Community Environment and Natural Resources Office (CENRO) sa Cebu City, Cebu City Park and Play Ground Commission ug pipila ka mga Non-Government Organization (NGO).

Gitataw usab sa naasoy nga director nga ang pagtuman sa maong balaod walay labot sa ipasakang kaso sa DENR-7 batok sa mga kawani og mga opisyal sa WT Construction, ang kontraktor sa road rehabilation projects sa DPWH-7, nga gitumbok nga maoy nanglarot ug namutol sa mga kahoy sa center island sa Sergio Osmeña Boulevard nga walay superbisyon sa DENR ug sa Cebu City Park and Play Ground Commission.

Nasayran nga gipaningkamotan sa DPWH-7 ug kontraktor sa naasoy nga proyekto nga madali kini sa paghuman.

Apan nahimong babag karon ang wala pa mangalarot nga mga tanum sa naasoy nga dalan hinungdan nga gihangyo karon sa DPWH-7 ang DENR nga libkason niini ang cease and desist order.