DOLE Mipasalig: OFW Luwas sa Kagubot sa Thailand

Gisiguro sa Department of Labor and Employment (DOLE) ug Philippine Overseas Employment Administration (POEA) nga luwas ang mga overseas Filipino worker (OFW) sa nasud nga Thailand.

Kini human gi-isa sa Department of Foreign Affairs (DFA) ang Alert level 2 sa maong nasud human sa deklarasyon og martial law didto.

Gitahasan na ni DOLE Sec. Rosalinda Dimapilis-Baldoz si POEA OIC Amuerfina Reyes nga ipatigum ang mga opisyal sa POEA aron tun-an kun kinahanglan bang ipatuman ang deployment ban sa Thailand.

Niadtong Enero ning tuiga, nagpatuman og deployment ban ang POEA sa upat ka lugar sa Thailand apan gibawi kini niadtong Marso 25.

Gitambagan usab ni Baldoz ang mga Pilipino sa Thailand sa paglikay ug magbantay sa ilang paggawas sa mga pampublikong lugar.

Sayo niini gimanduan ni Presidente Benigno S. Aquino III ang DFA nga tinoon nga luwas ang mga Filipino sa Thailand human sa deklarasyon og martial law sa militar sa maong nasud.