DOLE: Mga Trabahante Gibansay

Si Labor and Employment Secretary Rosalinda Dimapilis-Baldoz mibutyag nga mikabat sa 15,977 ka trabahante gikan sa 6,379 ka kompaniya sa tibuok nasud ang gibansay karon alang sa ka-epektibo sa ilang panarbaho.

Kini pinaagi sa pagpanguna sa National Wages and Productivity Commission (NWPC) sa Department of Labor and Employment (DOLE) uban sa iyang 16 ka Regional Tripartite Wages and Productivity Boards (RTWPBs) nga maoy kaabag sa pagbansay.

Gitudlo ngadto sa mga trabahante ang pagkab-ot sa hustong kakugi pinaagi sa pagtinabangay nila uban sa mga tag-iya sa ilang trabahoan, matud ni Baldoz.

Gani sa usa ka report ni NWPC Executive Director Criselda Sy, nga gikutlo ni Baldoz, kini nagbutyag nga gikan niadtong Enero hangtud Hunyo 2014, ang NWPC ug ang 16 ka RTWPBs nakapahigayon og 101 ka productivity orientation ngadto sa 4,309 ka mga kompaniya nga napahimuslan sa 9,940 ka mga trabahante.

Miingon si Baldoz nga mas daghan kini itandi sa tuig 2013 diin mikabat lamang og 2,551 ka kompaniya nga may 5,558 ka trabahante ang nabansay sulod sa maong gidugayon.

Gipasabot ni Baldoz nga kining productivity 101,may labot sa gikinahanglang produksyon nga makab-ot sa matag trabahante sa ilang panarbaho matag adlaw nga maoy basehan sa ilang mga suhol.

Lakip niini ang gitawag nga lima (5) ka S sa panarbaho nga mao ang (Sort, Systemize, Sweep, Standardize and Self-discipline),nga mga kinaiya nga angay huptan sa matag trabahante, Sumala ni Baldoz.

Midugang siya nga mao kini ang tukmang basehanan ug panukdanan sa mga tag-iya sa trabahoan sa suhol nga angay ihatag nila sa matag trabahante. “Apan hinuon bisan unsa nimo ka maayo og rekord sa imong panarbaho kalabot sa kakugi, kaabtik, pangutok , apan kuwang ka og desiplina sa imong kaugalingon ug magpasulabi ang kangil-ad sa imong kinaiya, dili ka mosaler, matud pa ni Baldoz.