DOLE-7: Productivity Bonus Angay Ipatuman sa mga Employer

Gitakdang pakigtagboan sa kadagkuan sa Department of Labor and Employment (DOLE)-7 ang mga nanag-iya og hotel ug restaurant dinhi sa sa Sugbo ug sa Central Visayas.

Kini aron pagpasabut kanila bahin sa pagpatuman sa productivity o performance base benefits ngadto sa mga kawani niini subay sa pagsulbong karon sa gidaghanon sa mga turista atol sa panahong ting-init og tingbakasyon.

Si DOLE-7 Regional Director Chona Mantilla mibutyag nga ang paghatag og productivity o performance base benefits mas makaayo sa mga kugihang mga empleyado ug sa negosyante usab.

Kini tungod kay masibot man ang mga kawani sa pagpaningkamot ug sa pagtarong sa trabaho tungod kay may madawat kining dugang benepisyo gawas sa makuha niini nga matag bulan nga sweldo.

Si Mantilla nagkanayon usab nga mas maayo pa kining pamaagiha sa paghatag og benepisyo sa mga kawani kay sa gipangayo karon nga usbaw sa suholan gikan sa labor sector.

Gani iyang gipahibawo nga pipila na ka mga transport operators ang nagpatuman niini nga gikalipay sa mga driver sa bus tungod kay mas dako na man sila og makobra nga benepisyo gawas sa ilang sweldo.

Subay niini, si Mantilla miingon nga mas maayo usab kining ipatuman ngadto sa mga kawani sa mga hotel ug restaurant ilabi na nga daghan na kini karon og mga kliyente.

Matud pa ni Mantilla nga ang meeting sa mga kadagkuan sa DOLE-7 ug sa mga negosyante sa hotel ug restaurant gikatakdang ipahigayon sa ikaduhang semana niining bulan sa Mayo ning tuiga.

Image Credit: pniintl.blogspot.com