DOLE-7: Negosyante nga Di Motuman sa Wage Order, Silotan

Gipasidan-an sa Department of Labor and Employment (DOLE-7) ang mga kompanya dinhi sa Sugbo ug sa ubang probinsya sa tunga-tungang Kabisaya-an nga mapahamtangan og silot kun dili motuman sa wage order nga naaprobahan sa Regional Tripartite Wages and Productivity Board (RTWPB-7).

Ang nahisgutang wage order mao ang paghatag og P13 nga Cost of Living Allowance (COLA) ngadto sa mga kawani niini sugod niadtong Marso 21 ning tuiga.

Matud pa ni DOLE-7 Regional Director Chona Mantilla nga ang iyang buhatan andam kaayo nga mohimo og aksyon sa reklamo sa mga kawani nga wala makadawat og COLA.

Hinuon gitug-an ni Mantilla nga ang mga gagmay nga mga negosyante mahimong makapangayo og exemption sa gipatuman nga wage order.

Iyang gitataw nga ang mahatagan sa exemption mao kadtong mga negosyante nga duha ka pa ka tuig sukad sa pag-operate niini ug kadtong apektado sa kalamidad nga nahitabo sa Visayas sama sa bagyo ug linog.

Apan iyang giklaro nga ang mga negosyante nga naapektohan sa kalamidad gikinahanglang nga mopakita sa libro niini nga naalkansi og dili mo-minus 20 porsyento sa ilang kita.

Hinuon si Mantilla miingon nga exempted nang daan sa naasoy nga wage order ang mga negosyante sa lalawigan sa Bohol nga apektado sa linog ug sa kalungsoran sa amihanang bahin sa lalawigan sa Sugbo nga gikusokuso sa bagyong Yolanda sa miaging tuig.

Gitug-an hinuon sa regional director sa DOLE-7 nga sa pagkakaron ang iyang buhatan wala pay nadawat nga hangyo sa exemption sa bag-ohay nga gipatuman nga wage order.